شعار عديلة هو حمار أحادي القرن… أخترنا الحمار لانه جزء من الذاكرة السودانية المعروفة وقاعد في أي حتة في السودان ومربوط بالاشغال والتنقل
في ثقافتنا السودانية بنستخدم وصف حمار باعتباره كائن بليد وما نافع، لكن في الحقيقة الحمار حيوان عندو ذكاء اجتماعي عالي وقدرة عالية على التذكر والحفظ وعنده قدرات تحمل كبيرة شديد، إخترناه مخصوص عشان نقدر نغير الصورة القاعدة في راسنا وبالعكس،عديلة وحمارها ناويين ينفعوا السودان والسودانيين/ات بإنهم يشيلوا القضايا التقيلة ويمشوا بيها لأبعد المسافات. القرن في راس حمار عديلة مربوط بالأساطير والكائنات السحرية والخيال، ونحن في عديلة بالنسبة لينا الفنون الفلكلور والثقافات القديمة وقصصها وأساطيرها من أهم الأدوات والأساليب البنتناولها عشان يكون شغلنا البنقدمه إبداعي وجديد ومختلف
ألوان الشعار هي:الأزرق الغامق يدل على المسؤولية والقوة والأزرق الفاتح يدل على الهدوء والسلام، والأصفر والأحمر والبرتقالي ترمز للحماس والشجاعة. وفي النهاية الصورة الكاملة بتدي حمار وحيد القرن، وهو حيوان قوي، أسطوري، شجاع، هادئ وحكيم ومسؤول، ودا هو حمار عديلة الإخترناه شعار لينا